Freelancing

Introduction post: ❤️ https://samehm1.blogspot.com/2021/02/introduction.html

يعني ايه فريلانسينج؟

يعني عمل حر ؛
تقدر تشتغل الشغلانه اللي انت عايزها
فالوقت اللي انت تحبه ( فـ لو مش بتحب تصحي بدري مثلا ممكن تصحي أي وقت عادي )
فالمكان اللي تحبه ( فالبيت ، فالكافيه ، أو فأي مكان ) كل اللي محتاجه:
١. مهارتك فالحاجة اللي هتعملها
٢. جهاز متصل بالـ نت عشان تتواصل مع العميل و ترفع شغلك عالموقع

- طب الشغل بيمشي ازاي يعني؟
بيكون حد محتاج يعمل شغل ، سواء مش بيعرف يعمله بنفسه ، او معندهوش وقت يعمله
فبيروح علي موقع من مواقع الفريلانسينج ينزل تفاصيل الشغل دا و محتاجه امتي ( ديد لاين  الشغل )

و من الناحية التانية يقوم ال Freelancer فاتح الموقع و لو الشغل و الفترة الزمنية مناسبين معاه بيقدم طلب و بيكتب ليه ممكن تختاره هو دونًا عن باقي المُتقدمين

فيقوم اللي مقدم الطلب يشوف احسن واحد ينفذ له شغله و انسب سعر فنفس الوقت فيختاره

و بعد ما يستلم الشغل و يبعت له الفلوس عالموقع ؛
الموقع بيطلب منه تقييم لل فريلانسر

او اللي عايز الشغل بيدخل يشوف ال Freelancers اللي فالمجال المطلوب و يدخل يطلب منه الشغل علي طول ( علي حسب طريقة الموقع ماشية ازاي )


طب ايه المواقع العالمية اللي ممكن تشتغل عليها؟
( علي سبيل المثال لا الحصر ) :

1. Upwork

2. Freelancer

3. People Per Hour

= طب معلش احنا مش بنتكلم انجيليش آول ذا طايم في مواقع عربية ؟

- اه في ، زي :

١. خمسات

٢. أي خدمة

٣. الحريفة

= طب ايه اكتر الشغلانات المطلوبة؟

- البرمجة

- التصميم ( الفوتوشوب و إيلوستريتور غيرهم من البرامج زي برامج المونتاج وما الي ذلك )

- الترجمة

- التسويق

و في غيرهم شغلانات كتير زي:

• ادخال بيانات - Data entry

• تحضير Presentations زي انك تجهز PowerPoint لحد

• التعليق الصوتي - Voiceover ( زي شغل الراديو و ال Podcasts و التعليقات الصوتية علي الشخصيات الكرتونية و الفيديوهات مثلا  )

وفي غيرهم كتير تقدر تدخل بنفسك عالمواقع و تشوفهم

كمان علي موقع زي خمسات تقدر تعرض شغلانة و لو حتي مش موجودة فال Categories زي انك لو بتكتب اغاني او مقالات مثلا و عايز تبيعها او غيره

طيب ايه اول خطوة؟

اول خطوة انك تشوف الحاجة اللي بتحبها عشان تقدر تبدع فيها و تقضي فيها وقت وانت مبسوط و مستمتع و تتعلمها كويس ( سواء من اليوتيوب او ال Online courses او غيره ) و تمارسها و تطور نفسك فيها

بعد كدة ، تعمل اكونت علي موقع و تفهم طريقته ماشيه ازاي ( و ممكن هنا تشوف آراء ناس خبرة فالمجال عالنت عن مواقع العمل الحر )

وممكن بعدها تعمل اكونت ع مواقع تانية تشوف لو موقع بالنسبة لك احسن من التاني ( كـ تجربة شخصية بقي )

ثم تعمل بروفايل محترم فيه مهاراتك و خبرتك و شغلك السابق زي مثلا لو انت Designer حط لينك بروفايل ال Behance بتاعك او غيره

وبعدها لو في تسعيره بتحطها بسعر متناسب مع السوق ( فتقدر تاخد لفه فاسعار الناس اللي فنفس التخصص عشان تحط حاجة قريبة منهم )

* و طبعا فالاول يفضل تحط سعر قليل بالنسبة للي معاك فنفس التخصص عشان تقدر تجيب اول شغلانة عالموقع و بالتالي تجيب Rate كويس تقدر تلاقي شغل بعدها بشكل اسهل ان شاء الله ...

لان انت كـ فريلانسر بيكون اصعب خطوة هي اول خطوة ( اول شغلانة ) .

وعشان تخلي بالك ميتنصبش عليك .....

نفترض انك بتعمل Logo لـ عميل - Client

طبيعي قبل ما يدفع فلوسه لازم يشوف اللوجو عشان لو معجبهوش او عنده تعديلات تعملها قبل التسليم النهائي

لو بعتته له و هو معندهوش ضمير ، ممكن يحمله عنده و يرفض الشغل معاك و خلاص..

فبالتالي عشان تضمن انه يدفعلك و فنفس الوقت هو يضمن انه عجبه خلاص ، ممكن تصور اللوجو بالموبايل من الكومبيوتر بتاعك و تحط عليه Watermark و تبعته له

لو عجبه هيدفع الفلوس و تبعت له اللوجو ، و يوافق عليه ، ثم الموقع يبعتلك فلوسك ، و أخيرا الكلاينت يكتب لك تقييم ... مبروك اتميت اول شغلانه بنجاح ⁦⁦🙏🏻⁩

وكمان تقدر تعمل حاجة اسمها Milestone

وهي عبارة عن انك بتاخد جزء من الفلوس علي مدار اتمامك مراحل الشغل و دي بتكون احسن لانها بتضمنلك فلوسك اكتر

= طب الفلوس ياااا ... هنستلمها منين ؟؟!

- الموقع هيديهالك علي موقع تحويل اموال اونلاين عالمي زي " PayPal " او " Payoneer "

و دول هيكون ليهم مقال منفصل ان شاء الله ، تابعوا البلوج .

و اخيرا، احتسب الأجر فتعلُّمَك و شغلك... "تعلموا النية فإنها أبلغ من العمل".
البوست دا مثلا فيه نوايا كتير ل 15 حاجة:
https://www.facebook.com/story.php?story_fbid=1651996808271502&id=100003835974640
فـ تفتكر ايه ممكن تكون نوايا الشغل؟

و بكدة نبقي وصلنا لنهاية اول بوست عالبلوج اتمني تكون استفدت و تفيد غيرك بانك تعمل له شير و تبعته لصحابك المهتمين لان "ذكاة العلم نشره".. تخيل حد يشتغل فحاجة طول عمره و تكون فميزان حسناتك لانك عرفتهاله ^^

لو عندك اي سؤال او تعليق او اضافة تقدر تكتبهم فالكمنت ...
شكرا ⁦❤️⁩